معرفشى انا فعلا ايه بورّيه لكن بورّيه
ومادام جدتى قالت بورّية
فاخلاص الكلمة أكيد موصول
وأكيد المعنى ف بطن الجده وبطن القول
انا مش مسئول
لكن تفسيرك للكلمات يتاخد دايما م الأحداث
من شكل الفعل ورد الفعل
وتوب الأيام المغزول
بكلام موروث
وأكيد فيه قاموس محروس بتراث
واكيد فيه ناس قبلنا حراس
من أول آدم ماتعلم كل الأسماء
انا مش مستاء
من كلمة تعبّر عن مخزونى وبتعرّية
فأكيد بورّية
بورّية من ايه
بورّية م الهجر وم التكشيرة وم الأحزان
بورّية من حب بدون تأشيرة
بيسرح فيّا ف كل مكان
بورّية من دنيا بتتلكك
وبتاخد منى وبتشكك رغم انى فقير
ويادوبك فاتح بقصيدة حتة دكان
بورّية وبعودر الشعر جبان
بيسامح معنى مهوش من بيت
وقليل الأصل بتاع حواديت
بيبل الحرف وبيطرّيه
بورّيه بورّية
بورّية م الشك وم الغيرة
وحصيرة قصيرة ما بتلمش أحباب وجيران
بورّية من ساعة العصرية
مبقيتش أصيلة ومصرية
وكأن الدنيا مهيش هيه
ولا هذا زمان
ماهو كان ياماكان
عندنا تقاليد وعادات وحاجات
مصطبة وسمر واخوات يجمعهم ضل قمر
ضحكات تتفرق مص قصب
وحسب ونسب واجران وجيران
محصول الجامع بتدرّية
بورّيه بورّية
بورّية م الزحمة وم الخنقة
والصوت العالى وم الزنقة
وكأن معادشى هناك منأى
غير انك تسكن وحدك فيك
وتعيش تتمنى انك تلاقيك
وتواجه حلمك وتورّية
انك مخاوية
بورّيه بورّيه
بورّية م الشعر وم الكلمات
اللى مدوخنى وراه مسافات
دا مابين الحرف واخوه خلافات
عاوزين له مجالس واجتماعات
ونفهم فيه ونعلم فيه
ونجيب له مشايخ ونقرّيه
والشعر ياريته بيطمر فيه
بورّيه بورّيه
بورّيه بورّيه
من ايه أو ايه
بورّيه من قلبى اللى مجننى ومش مراضيه
بورّيه من بكره اللى بيوعدنى ومش بلاقيه
بورّيه م الحب اللى معذبنى اللى مدوبنى ف نن عنيه
بورّية من كل اللى انا مش فاكره لكن باعنيه
بورّيه بورّيه بورّيه بورّيه
.............
حمدي موسى