يا حرقه قلبي لما ببص للصورة
و أنا شايف علي الرمله ضنايا زي عصفورة
مهيش طايرة و بترفرف و لا جناحتها مكسورة
دا متغسل بموج البحر متكفن في لبس العيد
و دافن وشه ف الرمله
و جزمه في وش حكامنا
و رافض كل أحولنا
و رافض حتي يبقي سعيد
يبلغنا بإن إحنا و لا نسوي نكون له عبيد
يا قلب إمك يا قلب أبوك
أنا معرفش إيه إسمك و لا إللي جابوك
ملامحك حتي معرفهاش
ملايكة ربي هيزفوك
مادام الموت بيوصلك في أي مكان
و ابوك هربان علشان يحميك فمات غرقان
فكان لازم تموت غرقان
عشان غيرنا يموت من لذة النسوان
....................
بقلم .. مصطفي تيسير