ادخل وسك البيبان وراك
واقفل شبابيك الحياه
البد في خوفك واحضن في ضعفك
واستني من ربك نجاه
واياك تفكر تعود لعالم
الظلم اصله ومنتهاه
ادخل في كوخك وارحم نافوخك
والحم شروخك يمكن تلم
انسي البشر كل البشر
واقتل ف قلبك أي حلم
دورك مهمش في الحياه
كومبارس عايش جوه فيلم
مستني ايه من دنيا فيها
البشر زي الغيلان
مستني ايه من ام باعت حضنها
لندل وجبان
لساك بتحلم تحضنك
لساك بتحلم بالامان
لساك بتحلم بالخضار
والارض بور
لساك بتحلم بالنهار يملي الجحور
لساك بتحلم بالعمار وسط القبور
لساك بتحلم بالعداله تجيب حقوق
لساك بتحلم بالعداله ف يوم تفوق
لساك بتحلم بالسواد يولد شروق
لساك بتحلم والامل لساه محاصرك
لساك بتحلم والالم خانقك وعصرك
لساك بتحلم مع انها
مابقتش مصرك
..............
السيد مصطفى