اسأل عــــن اخــــوك
شـوف عــــامـــل ايه
خد بـــالك ابـــــــوك
كــــــــان وصى عليه
قــال لك تهتم بإخــــواتك
ماتكونش جحـــــــود
حسسهم دايماً فى حياتك
إنك مـــوجـــــــــــود
ماتسيبش الود اللى ما بينكم
يصبح مفقود
......................
خليك ف تعاملك وياهم
تبـقـى المسـئول
خفف أحزانهم وبكـاهم
عينهم على طول
ازرع بستانهم كام ورده
راح تجنى ورود
.........................
ف الدنيا مافيش شىء حيدوم لك
ولا شىء مضمون
ولا شىء يرضيني ويرضي امك
غير قلب حنون
صدقني مادام وسط اخــــــواتك
الصعب يهون
والخير المعمول لأخواتك
لازم ح يعود
....................................
فبلاش تتعاملوا وبعضيكم
زى الأغراب
ماتسيبش الناس تنظر ليكم
يوم بإستغراب
يابنى الأخوات أخوات دنيا
والآخره حساب
والجسم اللى انت بتفرح به
راح ياكله الدود
.................................
ف الشدة اخواتك ح تعينك
مش عاوزه كلام
خليهم ف حبابي عيونك
بص لقدام
وايـــــاك تتكبر او تبعد
وتقول مشغول
دا نعيم الدنيا وزخرفها
حيزول حيزول
لو واحد بيحبك يعنــى
فيه ألف عزول
وطريقك من غير اخواتك
ح يكون مسدود
...............................
المال والجاه مهما بيكتر
حيفيدنا بإيه
فيه حد بيجني ويستنظر
غير صنع ايديه
واخوك لو بالحسنى تعامله
راح يهدي عينيه
ويحبك دايماً ويطيعك
وبخيره يجود
.............................
المال والجاه مهما بيكتر
برضك منفات
ولا شىء ح يدوم لي وحيدوم لك
غير الأخوات
والذكرى اللى بتبقى تمللي
لو واحد مات
باخواتك لو ضهرك محني
ح يكون مشدود
اسأل عن اخوك ح تريحني
وترضي المعبود
مش اى نصيحه بأقولهالك
دى نصيحة أبوك
اسأل عن اخـوك
.................
أحمد حسن عمر