جانا العيد أهو جانا العيد
انسى الحزن وروح لبعيد
جاى بيجدد لينا الفرحــة
يخلِّى شموع الحب تقـــيد
اقلع كل شجر أحـــزانك
وازقى الحب ف كل قصيد
خليك زى الشمس تـنوَّر
تنشر خيرها ف كل صعـيد
اصفح سامح كل النــاس
امسح دمع معاه تنهــــــيد
خليك زى الطفــل برئ
يرمى الضحكة بصوت تغريد
ناس محتاجة الضحكة دى منك
مش محتاجة فلوس ورصيد
جاى العيد يمسح أحزانا
يرقق قلب معانا حديــد
جدد ود لكل قرايبـــــــــك
جارك أوعى تسيبه وحيد
إياك تنسى حبيبى زمايلك
ولاَّ يتيم ف هم شريــد
طفل يتيم محتاج لحنان
زى الكسوة ولبس جديد
ومريض زوره خفف عنه
وردة فى إيدك أمله يزيــد
افتح كل بيبان للفرحــــة
رايح تلقى الحزن طريـــد
اقلع كل اللون الأســـود
خلى الأبيض رمز أكيـــد
شيل تكشيرتك من فوق وشك
وارسم ضحكة بوش سعيد
افتح بيت الناس هتـــزورك
وابعت هنـِّى فى كل بريـد
جانا العيد أهو جانا العيد
انسى الحزن وروح لبعيد
...............
راضي علي الطهطاوي