يا حمام
غرٍّد ونوح
ليه بتعشق من سكات
مش بتعلن أو تبوح
مين يلومك لو تحب
أو تتوه حتى ف مدارى
ليه بتكتم ليه تدارى
يالا ابكى بصوت يلالى
ابني عشك ف العلالى
تلقى قلبي ليك وليفك
يبقى كل الكون أليفك
مهما بجناحك ترفرف
مهما تبعد أو تروح
اكتب الأشواق فى نوته
احلى ضل ف أعلى توته
خلي كل الدنيا تعرف
لمَّا ورد الشوق يفوح
اللى يعشق ليه يخبي؟!
املا روحك شوق وعبى
لمَّا ينده حب لبى
واعزف الألحان وردد
أحلى غنوة
تبقى بلسم للجروح
لو هتلقى الغيم قصادك
ولا همّ الدنيا صادك
طول ماحبك شئ برئ
كن جرئ
واعلن جوه العالم حبك
قول الحب زفير الروح
مهما الكون عنك يتغرب
لما الناس منك تتهرب
جرب تعزف لحنك صولو
واركب جوه سفينة نوح
.............
راضي الطهطاوي