لما باقولك باعشقك
وتروحى منى ف الكسوف
والنظرة تبقى كأنها
لسه بتتعلم تشوف
والصوت بيهرب م النفس
يتدارى عن عين الحروف
باشعر كأنك من كبار الأوليا
والعاشقين حوالين مقامك بالألوف
اللى يطالب باللقا
واللى بيشكى م الوفا
واللى بيدعى بالشفا
واللى بيدعى ع الظروف
واللى مالوش دعوة بأشياء البشر
وجاى بيتمتع يطوف
باحس انى باجرحك
لما باشيل الكسوة من فوق المقام
باحس إنى بافضحك
رغم انى جاى ارمى السلام
معلش اسف اعذرينى واغفرى
انا اصلى فى دين الهوى من غير تجارب
لسه خام
لما باقولك باعشقك
وتروحى منى فى السكات
باحس أنى ماليش طلب ولا أمنيات
غير انى احاول المسك وأونسك
تسرح مشاعرى ف مهجتك
توصل لغاية سرك الباتع آهات
ونروح سوا بعد الأمل
نكتب هوى من نوع جديد
من عير حروف ولا مفردات
تبقى المعانى نظرتك
والشرح مش عاوز لغات
لما باقولك باعشقك
ببقى على وشك الممات
..............
حمدي موسى