لسه القصيدة بتنكتب والمعنى لسه بيتولد
جوه الحروف
كلمة باحبك واقفه على جنب انما متعلمة
لكن بخوف
يا شمس بكره المبهمة ومصممة
تطلع كسوف
حنى على الغربة اللى ساكنة وحدتى
ناولينى أول فرحتى
هاتى المشاعر للكفوف
ياشئ غريب جوايا مش لاقى الوطن
ياعيونى يا للى بتنفتح حسب الظروف
ياقلبى ياللى مالوش معاد بيدق فيه
يا فرحة ملهاش ابتسامة معلنة
ياإسمى ياللى على ىالبدن
وعلى الصور وعلى البطاقة
وفوق جميع الألسنه
ممكن تقوللى مين أنا
يا محزنه ياللى بتجرى ف جتتى
يالهوتى ياللى معايا ف فكرتى
يا سكتى ياللى طريقها غربتى
حريتى محتاجه عفو من الزمن
والله انا دافع تمن...رغم انى كنت المؤتمن
على حزين الحب فى قلب الكشوف
ياصبر يامهر الفراق
ياابجدياتى اللى ناقصه حاء وباء
يا جملة الأشياء حقيقة او خيال
ياكل علامات التعجب والسؤال
الصمت فاق الاحتمال
الحلم قرب ع الفناء
يارب خدنى لسكتك
ارحمنى من كل ابتلاء
اغفر ذنوبى كلها
اللى انت عارف اصلها
يسر لى هجرة لرحمتك
إنت الأمل وانت الرجاء
........................
حمدى موسى
حمدى موسى