لما باقولك باعشقك
باوصل لأول عمرى من ناحية ايديكى الطيبة
وباكون صبى لما عنيكى تبص لى
وما تعمليش للناس مقام ولا تحسبى
واصبح شباب لما بتبقى قريبه
وابلغ تمام المرجلة
وانا جوه حضنك بانسند ع الطبطبة
وباكون عجوز وباحس انى مش حقيقى
واحتمال أو ربما أو قد يجوز
لما باشوفك تزعلى
واشعر بإنى صبحت شيخ ضهره انحنى
لما باحس انك ما أصبحتيش أنا
تبقى الحياة مش ممكنه
وبابقى كهل واكون على وشك الممات
لما تقولى نفضها سيرة بقى
وترجعى خيط الحرير
اللى اتنسج على حبنا للشرنقة
ما تعرفيش يا حبيبتى عمرى كام سنه؟
تاريخ ميلادى مش لاقى له يوم صريح
ما بقيتش عارف يعنى ايه واحد صحيح
حاسس كأنى بقيت كسور اتفرقت على دنيتك
لمينى يمكن ينصلح حالى العوج
وارسى على عمر الهوى
وده مش ها يحصل إلا لما نكون سوا
عمرى وعمرك يبقوا فى واحد جسد
يتقسموا على حب محمى
بقل أعوذ وقل أعوذ
وقل هو الله أحد
===============حمدى موسى