احساسى اللى معرفتوش
شعورى اللى مالوش أسماء
واقول عنك فى غيب قلبى اللى انا فاهمه
بحكم طبيعة الأشياء
ألف باء الحياة اتنين
انا وانتى
وتنهيدة على أوتار
وانا قلبى خلاص واقف على دقه
ويبقى كمل المشوار
وخايف بعدها ينهار
لأن الشعر كان مشرك بكل العشق
وكان بيقدم القرابين لأصنام الهوى طاعه
وياما فى الغرام أجرم وأد أحاسيس
تعامل بالربا فى الصمت
ومسكرشى من اللهفه وخد حسنات
فكان لازم يعيد النبض م الأول
ويرجع تانى يتحول لحس جديد
ويوصل بكره بامبارح وبالنظرات
ويعرف إن حبك حق ويصدق رسول عينك
ويتمنى يموت فيكى و بإيديكى
عشان الجنه ف عنيكى
ولو عدى حدود الفكر ونسيكى
يروح النار
وبالتالى هقولك ماهو متوقع ومستنظر
باحبك حب مش بالعقل ولا بالقلب
عشان حبك مهوش مفهوم
كأنى لسه باتشكل ومش معلوم
كأن الفطرة جوايا بتتكون وتتمكن
كأنك حاجة زى الأكل زى الشرب زى النوم
انا اللى بتولد تانى فى هذا السن
أكيد محتاج لأم الحب ترعانى
أكيد محتاج لهذا الحب شئ تانى
حنان غير اللى قالوا عليه
ولمسة بس مش بالإيد
انا محتاج للمسة روح
وعشق جديد
يواكب كل احلامى يساير موضة اللمسات
انا عاوز إعادة شرح معنى الحب
تغيير اتجاه الفكر
تعريف السهر والآه
ما تملكينيش سيبينى أعيش
انا لسه باكون بشويش
انا عاوز رحيق الحب يتحول لشهد حياة
انا باتعلم النظرة ولسه بعرفك بالصوت
ولسه صفحتى بيضا بدون أخطاء
لأنى لم أكلف بعد
ماوصلتش لسن عتاب
حبيبتى ياللى حبك طاب
انا العاشق بدون أسباب
وناوى انى أخليكى بدال القلب
وناوى كمان أعديكى حدود الحب
انا ناوى أكون البعث
وناوى نروح لعالم من خلال الهمس
هقولك باعشقك فى الحلم
هاخبيكى ما بين الصمت والفكرة
هاحضر لك كلام بكره
واجهز لك شعور مخصوص
وهابنى لك ف كل قصيدة بيت مرصوص
بكلمة من دفا خالص
وكلمه من أمان محسوس
وهافتح قوس
واقولهالك بطيش الشعر وبحرية الأحلام
باحبك بس مش بكلام
يجوز بسمة ..يجوز دمعة ...
يجوز البصمة فى الإبهام
ونقفل ع المعانى القوس
......................
حمدي موسى