سألناهم عن الشهدا
وعن أطفيح.. وماسبيرو
وشارع مجلس الوزرا
(وسحل الناس)..وتفسيره
قالولنا السر في الفوضى
(طرف تالت)..مفيش غيره
وقالوا أجندة من برة
وخطّة علينا مـرسومة
تعبنا معاكوا بالمرة
مفيش ولا حاجة مفهومة
وقام العم (سيساوى)
وقال أنا جاتلي معلومة
شباب الثورة والإعلااام..
وأهل الشهدا..ياساادة
بيتآمروا ..وقالوا كلام
يزيد الفتنة بزياادة
قرفتونا (بعماد عفت)
ومين اللي..سحل (غادة)
(بيااان من قادة الأركان)
ياريت الكـل ..يسمعنا
هانصطادكم في كل مكان
ومين فيكم..هيمنعنا
باقولهالكم..من الآخر..
مفيش ثورة..مفيش تغيير
ولو لسة الشباب فااكر
بإن الحلم في التطهيـر
بلااش ياشعب... تستهبل
نجوم الضهر ليك أسهل
قسمناكم..فريق وفريق
ونجحت خطة التفريق
قتلنا الثورة في قلوبكم
ولسة الجيش حبيب وصديق
عملنا الأمن.. فـزاعة
ودخلناكوا في مجاعة
ما بين الغاز.. وبين الجاز
لحد ما تعلنوا الطاعة
وطول ما الحكم في إيدية
لايوم هتشوفوا حرية
ولا الشرطة هتحميكم
لحد ماتركعوا تاني..
وتيجوا تبوسوا في إيدية