نفس الايادى مكربجة جيدنا
نفس الوشوش سارقة ملامحنا
نفس العتامة . و لا حد ينجدنا
لا ندرى مين قاتلنا ولا مين بيدبحنا
--------------------------
الشر سرسب مرار نار جوا حواشينا
مخلب بلا رحمة و منشوب ف روحنا
لا الخطوة عارفة لفين احنا مشينا
و لا احنا عارفين امتا هتطيب جروحنا
--------------------------
مسكوت عليه الحق و لا فى صوتنا
حقيقة مرفوضة و خايفة تصارحنا
عايشه سلاسل فينا فارضة سكوتنا
ولا قيود ايادينا كاسرة جموحنا
--------------------------
نفس الايادى مكربجة جيدنا
نفس الوشوش سارقة ملامحنا
نفس العتامة . و لا حد ينجدنا
لا ندرى مين قاتلنا ولا مين بيدبحنا