انا من غير عيونك دول
بصلى بقلبى فردانى
برغم الجسم فى جماعة
باحس بإنى متقطع كذا حاجة
واحس الدنيا خداعة
باحس بإنى مش موزون وفيا شئ مهوش منى
ورافضه الجسم أكمنى نسيج قلبى
بيرفض أى حس دخيل
وحشتينى يابنت الحلم يا ملجأ آمان العين
وحشتينى وفكرى فيكى سارقنى وحارقنى
وبيسوينى ع الجنبين
مكان الذاكرة مبهم
انا عاوز طبيب شاطر يوصلنى لعنوانه
عشان اطرد جميع أهله وسكانه
وابنى لك هناك قصرين
تكون الفكرة هيه انتى تكون الذكرى هيه انتى
يكون الحس من لمسك يكون الشعر م العينين
انا بعدك بكون عابر سبيل روحى
بيتهيألى إن العمر مش مسموح
وادوّر فين انا منى واسألنى انا إزاى ؟
ودايما باسمع الرد اللى بيجينى فى صرخة ناى
يقوللى خلاص متسألشى
سؤالك اصله مش مطروح
حبيبتى يا سما بالى يا أرض الشوق
يا نسمة بس فى خيالى ..ياضلة بس طلعت فوق
بتقعد تحتها روحى وبتمدد على سيرتك
وترمى ف حجرك الآهه
تصحينى شموس الخد وياها
يشقشق فى الغرام نورك باول ضوء
وحشتينى ولما بتبعدى عنى باحس
بإنى مش مخلوق
واحس بإنى طين ناشف وكلى شقوق
عشان خاطرى تشوفى حل فى الفرقه
خلاص مليت من الغربة
دانا عايش حياة سرقة
دانا متغطى بملامح ماهيش واضحة
وكل وجودى كدب ف كدب وعيونى بقت فاضحة
بقيت صايم عن الإحساس
ونفسى ف عيد يبل الريق
ويروى القلب بالفرحة
لكن ارجوكى يانادرة
بلاش العيد يكون أضحى
........................
حمدى موسى
حمدى موسى