وضحكتك مسافات قلق٠٠٠
وبحور معبيها الانين ٠٠٠
وانا جوه همى بندفع٠٠٠
الموج بيعلى ويرتفع
وماليش شطوط٠٠
غطاني موج اليأس
من الراس للقدم٠٠٠
ومعادش بيفيد الندم ولا الدموع ٠٠٠
مجموع على الحسبه الغلط ٠٠٠
مطروح من الفرح اللى ساكن كل دار ٠٠٠
معجون بطين الارض وكاسينى السمار ٠٠٠
ايدى وليفة الفاس ورافضه تخلعه ٠٠٠
رافضه قانون الخلع ولابعد مدى٠٠٠
باقلع جذور الخوف وبزرع ضحكتى ٠٠٠
لكنى مستنى المطر
شارب كاسات الصبر من تلاتين سنه ٠٠٠
محذوف من الفاضى
ومتضاف على لا شيء ٠٠
مستنى ناتج عمرى واعرف سكتى٠٠٠
يا مين يقولى لا غلط ٠٠٠
علشان اصلح غلطتى
فتش معايا تحت اكوام التراب
٠٠٠ يمكن نلاقى فرحتك
ماسكه فى ايدها فرحتى
.........
عادل شوقي إبراهيم