نفسى..قصيدة للشاعر / ميدو زهير

نَفسيِ ف عقليِ بتناكِف
وقلبي ف الهَوَي مخالِف
وانا م الصَعب أتألِف
بحاول ... بَس مِش عارف
وبالي تَمَلي فيه طارِيء
علي أغبيَ البِيبان طارق 
ومِش خايف
وحَبة اسلُك سلُوك تالِف
وحَبة اغلَط أقول أسِف
أقوم واقف
وخُد مني أدب جَارف
وفجأة تبُص تِلقانيِ
علي كُل الصِيع لايف
واحِب ف كل شئ أنجِز
ماحِبش الوك واتضايف
وازعَل لَجل شئ هايف
وافرح لَجل شئ هايف
واحِب فلحظة اكون طايش
اقوم لايش و مِش شايف
وانا شايف ... وعارف
بس مش عارف .