صباح الخير
......
صباح الخير يا أجمل حاجة فى حياتى
يا سيدتى يامولاتى
صباح خارج لرزق الحب
وبيسعى على الأشواق
صباح طالع ومش عاوز يفوّت لحظة
ولا عاوز يروح لمساء
صباح الخير على عيونك..على خدك
..على قدك...لغاية الكعب
صباح الخير يامشكلتى..يا أسهل صعب
عارفة حبيبتى لو كل البشر خلصوا؟
انا وانتى وكلمة حب نعمل شعب
صباح الخير يارزق القلب ياصابحة تسر العين
انا والله متهيألى إن انتى دعا الوالدين
بقيت اجرى واسابق الليل اخبى الفكرة ف الفكرة
بقيت اعشق صباح الخير عشان هو دليل بكره
بقيت اهرب من الساعة
وبتدارى فى أول ضوء
يأذن كل إحساسى نصلى الحب فى جماعة
انا يا حبيبتى وياكى باحس بتقوى...بالطاعة
صباح الخير ياصاحبة كل ما فيا
با مالكة الميه فى المية
باحبك موووووووووت
ومتنازل بكامل وعيى عن احلامى وعنيا
وكافة شئ يكون فيا
ومش عاوز ولا حاجة تكون منى
تعود ليا
خدينى أمانة خلينى ف احضانك
وخبينى وشيلى النقطة من ع الخاء
قوليها وبصى فى عنيه
وبعدين ابقى حطيها فى نن العين
وهاتى قبلها همزة وخللى اللحن أمنية
وحشتينى وانا ف حضنك وبين البين
انا نفسى أشيل النقطة من ع الضاد
واتحامى ف شرايينك كأنى جنين
حبيبتى أصل انا وانتى ما ينفعشى
ما ينفعشى...ما ينفعشى
نكون اتنين
...................