شاهد على شرط الغرام بينا
مفهمنا
كلام مشروط
كلام ممقوت كلام مربوط
ملانا سقوط
ملازمنا
على سكة سفر للموت
كلام منقوط معلّمنا
غريب اللفظ والمعنى .........بيجمعنا
ويقلعنا
كتاب العشق والمعنى
يشيب شروق الشمس
فى اللفه
ولازفه
لعرس الحلم من تانى
ولاتانى
يقابلنا
يحولنا رصيف جامد
وصيف بارد
ولحظة ضعف مولوده
وموجوده بتفجعنا
وتوجعنا ليالى الهجر من تانى
وتلقانى
ببيع اللحظه مخنوقه وبتعانى
وتلقانى
شكوك شالت مشاعلنا
وتشعلنا
وتشغلنا هروب الكلمه
أحيانا
وأحيانا تغازلنا
يحللنا شرود الذهن من تانى
فبنعانى
وتتحول عناقيد الغرام لعنه
وتفجعنا
وتسمعنا بنتحسر على صورة
وصال كانت
بتدفعنا
لكام فرحه
وكام معنى فى يوم ساعنا
ولوّعنا خصام موجود
بيعزمنا على جثة امل مفقود
فى ليل ممدود
ملانا وعود بلحظة نشوه
تسمعنا
..........................
شعور
شابك فى سنّارة
شباب القلب
مستنى
شهادة شط مستعفى
على شعرة
ومن نظره تشوف الشعره مشقوقه
مابين اللهفه مشنوقه
ومفروقه
مابين شارب كاسات الشعر
مش شايف
شقوق الشرخ
من جوه
ومش عارف لمين هوه
ولاقوه
لقلب حزين
بيرفعنا لعين شافت
مابين شامت
وبين صامت
وبين رافض نكون قوه
فلا هوه بيمنعنا نكون عشاق
ولاعارف يكون مشتاق
فيجمعنا غرام الفرقه ونعانى
ونتقابل على كلمه
ماليها وجود
ولامردود
يادوب كلمه
بلا معنى
...............