انا نفسى اكتب لك صدّيقة
وتحوز على نص جمال الشعر
يقروها مشايخنا الشعراء
بقراءة بيرم عن حداد
وأبيّن إن القلب برئ من دم الحب
تتقطع إحدى إيدين الشك
ان قال أو عاد
وأكيد لهواكى والمّ الشوق
وأزوّد حمل بعير من نور
وأفسر رؤيا القلم الحق
وانه هايسقى السطر مداد
انا نفسى اكتب لك شعر
يراود قلبك عن نفسه
يستبق الدم إلى الدقات
واقولك هيت
يرد يقوللى حنانك هات
انا أصلى باحبك حب
اللحظة تساوى سبع سنوات
وتعبت وفكرى ابيضت عينة من الدمعات
وخلاص ما بقيتش استحمل بعد
مشاعرى هاتطلع فى مظاهرات
انا قمرى بيبعد عن نوره قرب يسوّد
لدرجة انى كرهت الجد
ماهو لما يكون الجلد جعان
ازاى بيقيموا عليه الحد
الشرع رؤوف
وانا وانتى قصيدة زيادة حروف
عدت كلماتى عن المألوف
طب انا اعمل ايه
والقلب ما بيقدرش ظروف
حبيتك اكتر م الجنة
علشان الجنة بدون مقياس
لكن انا شوفتك يا حبيبتى
على وزن الناس
فالقيتك عديتى المتعارف
عنه من الإحساس
ولذلك انا هايم فيكى
بتمنى تكونى لبكرة خزين
واخرج من سجن الظلم عزيز
بتمنى يا أجمل حاجة ف شعرى
اقلب موازين
بتمنى اكتب لك أحسن قصة حب
ترد النور لعيون الناس
وتزود فوق الخمسة...حواس
انا أصلى باحبك مش بالقلب
عديت انا حب القلب خلاص
انا مت شهيد
ودخلت لجنة قلب العشق
بقلب جديد
مافيهوش غير صورتك
ملضومة شريان فى وريد
والقلب بقى يساعى عيونك
غفران ووعيد
وباقول للقلب انت استكفيت
فيرد يقول ادينى مزيد
انا نفسى اكتبلك مش معقول
كلمات تنطق فى المهد تقول
الشعر برئ ...القلب برئ
وان انا صدِّيق
ولا عمرى ف حبك يا حبيبتى
ضيعت شقيق
وتجينى عيونك بعد غياب
تسجد للقلب سجود تكريم
وانا وانتى نكون على عرش الحب
يكون تفسير الحلم حياة
مكتوب ف ديوان الشعر الأبدى
وياخد حق الطبع الكون
يتناقش نص هوانا حبيبتى
غلاف المعنى على العنوان
ويكون الفهرس اسمك بس
وتكون كلمات الصدّيقة على كل لسان
والحرف الواحد يتفرّق على ألف ديوان
............................................
حمدى موسى
حمدى موسى