حطة يا بطة الشاعر مات ..
يلا نلف سبع لفات ..
درس العربي اليوم يا إخوانا ..
فيه الفاعل و المفعول ..
فيه القاتل و المقتول ..
فيه الأكل أساسي الفول
فيه الفارس و ام الغول ..
فيه الراجل و الستات ..
فيه الهانم و الأغاوات ..
درس العربي كله أهات ..
فيه التعلب لف و فات ..
حطة يا بطة الشاعر مات ..
درس تاريخ اليوم يا إخوانا ..
فيه الحاضر ديما غايب ..
فيه القصة مليها عجايب ..
فيه الغايب ملهوش نايب ..
فيه النايب ديما خايب ..
فيه الغالب و المغلوب ..
فيه الناس صبحت أيوب ..
فيه رمسيس و فيه مسلات ..
حطة يا بطة الشاعر مات ..
درس حساب .. اليوم يا إخوانا ..
بيعلمنا الضرب بيوجع ..
بس بينفع ..
ضرب و قسمة ..
جمع و طرح ..
لسه كتير قدامنا الشرح ..
طرح و جمع ..
إتعلمنا الطاعة و السمع ..
طيب ناقش طيب جادل ..
دا كان رأي الأستاذ عادل ..
إن عشان م أكون إنسان ..
لازم ختم علي الشهادات ..
لازم يبقي معايا حجاب ..
أو تعويذة من الأموات ..
لازم أعرف حطة يا بطة ..
لازم ألف سبع لفات ..
شكرا للشاعر الجميل الكاتب والناشر
ردحذف