من غير حساب الشمس بتشقشق زَهَق
وبتفرك الحلم الجبان اللى دوشنَا واتخنق
وبتحرق الإيد اللى مدِت شوقها ليك
وبتلفُظ الأنفاس كريهة
ع البيوت _ _ ع الشطوط
ع السكوت اللى مَنَع كُل الدموع
من حقوقها فى الحنين
ع التماثيل البريئة صُنع وهم العتمة فيك
إنت حَد بجد شيك
عارف الأحزان موانى بـ 100 رصيف
راسم الألوان معانى
كُل معنى بلون خفيف
بس أحيانًا سخيف
لمّا ترسم وِش ضحكة ع الغياب
وامّا تحسم أمر روحى بانسحاب
وامّا ترمى قلب حَبَك فى التراب
ياسراب
ياكتاب الرحمة حلوة
ع الحروف الدايبة من كُتر المِحَن
ياسليل المفهومية والنباهة والعفن
إنت واضح ليّا جدًا
حتى لو خبيت ملامحك
جوة 100 مليون قناع
إنت ليه فكرت إنك
لو تفوت الفرصة منَّك
تبقىّ خايب فى الخداع
فى الجدال الأرض بتنبت صُداع
توهبك ساعتين رزيلة
وانت أضعف من ضعيف
ياخفيف الدم عطَّر الورد زيف
ضى نظراتك مواجع واغتراب
إنت غايب _ _ بس سايب ألف معنى للغياب
لمّا حَل الوهم بيَّا فى الخريف
إنت كُنت بجد أسوأ ضيف خفيف
____________
رشا الفوال