على لحن الحنين والخوف
وشعر الغربه وحروفه
دموع ترقص وهم يطوف
قصاد عينك ولا تشوفه
يحسه قلبك الملهوف
ويلعن حظه وظروفه
وتصرخ قد ما تصرخ
وﻻ يسمع صراخك حد
تعيش والضحكه منحاشه
وألمك بالوجع يشتد
وحرفك بالدموع ينزف
وسهرك باﻷنين يتمد
وتصرخ قد ماتصرخ
وﻻ يسمع صراخك حد
وتبدأ تحكي لحروفك آهات جرحك
وتنزل ع السطور جمرات
تنادي بصهدها العبارات
تحاول قد ماتحاول
تعيد للزكريات قلبك
وتكتب فيها ياغربه
كفايه جراح
كفايه شعورك الميت قصاد قلبي
وفرحي اللي اندفن فيكي ومتخبي
وبدني اللى العفن صابه ومش مرتاح
كفايه جراح
حكمتي عليا باﻹعدام وانا ميت
فرضتي عليا قوانينك وانا ميت
نزلتي عليا بالكرباج
وجلده تحط ورا جلده
وقطر العمر بيعدي
على انسان صحيح عايش ...... ﻻكن ميت
وطيف الفرح ناسيني
ونار الهجر تكويني
ياغربه بزياداكي عاااااااد
كفايه عليا شوق وبعاد
كفاياكي أسى وعناد
وخلي جنتك ليكي
وعودك ياما بسمعها ومبتحصلش
ودانك لسه مسدوده ومبتسمعش
أنا مليت أعيش فيكي
كرهتك يوم ماضميتي الجسد ليكي
وشوكك دب في صدري سهام الخوف
من الحاضر ومن بكره
وعشت معاكي بالذكره
وبالجرح اللي مالي الجوف
ودبلت روحي وياكي كما الورده اللي مقطوفه
وعودها بيعزف اﻷلحان
على لحن اﻷنين والخوف
وشعر الغربه وحروفه