قرب لى الزوووم...قصيدة للشاعر / مصطفى تيسير

مشهد (1) ..

في نهار خارجي .. مع صوت لادان ..

مع الصورة لثورة ف وسط ميدان ..

و الصوت بيزيد ..

الشعب يريد ..

من غير تحديد .. 

الكاميرا بتاخد وضع الزوم ..

و تلف كمان ..

لابيض و إسود يقلب ألون ..

مشهد ( 2 ) ..

البنت بتحضن إيد الواد ..

و عيونها تنزل كام دمعة ..

بتقوله أكيد راح يجي ميعاد ..

و بلدنا تكون للكون شمعة ..

الدمع بينزف ع الأسفلت ..

البنت يبان في عيونها الخوف ..

مش عارف مين حدف المولوتوف ..

و مين علي بعد بيضرب نار ..

الواد بيقول ربك ستار ..

مشهد ( 3 ) ..

الواد متصاب جوا الإسعاف ..

إتصاب برصاص ..

علي إيد قناص ..

و محدش شاف ..

الواد يبطمن قلب البنت ..

و الدم بيمسح أي خلاف ..

و الحلم إتغطي و شد لحاف ..

مشهد (4 )

القائد طالع يلقي بيان ..

مصر يا محروسه بإذن الله ..

ملعون من خان ..

ملعون أبو إم الخوف دا جبان ..

دا الثورة بتحرص كل ميدان ..

و بلدنا بتجمع ف إديها ..

مسلم و مسحي جرس و أدان ..