قال بتقوللى البت يا أونكل
نعمين ياختى ؟؟
أنا مين قولتى ؟؟
يعنى أنا شكلى خلاص إتحول ؟؟
عجزت ويتقاللى يا أونكل ؟؟
أنا عجزت ؟؟؟
يانهار طين
أيوة صحيح
مانا عديت سن الخمسين
وبناتى بقوا طولى عرايس
وابنى خلاص بقى صوته تخين
فاكر أيوة إنى اتجوزت
بس خلاص
يبقى أنا عجزت
أما أنا طشط
دانا حتى مالحقتش عشت
ولاهلست ولا هييست
ولا هيصت ولا فرفشت
ولا يوم بعت ’ ولا جمعت
ولا كوشت ، ولا حوشت
أمال إيه ؟؟؟؟؟؟؟
عمرى إتسرب منى فإيه ؟؟
عمرى إتسرب فى ولا حاجة
أمال ليه أنا بابكى عليه ؟؟
دانا من يومى عمال أجرى
واحبى على ركبى وعلى كفى
علشان أتحصل على أجرى
ويا ريت أجرى كان بيكفى
ياما جريت
ياما تعبت وياما شقيت
ياما حاربت وياما سعيت
علشان أكفى حاجات البيت
ياما لفيت
ياما لفيت ، ياما لفيت
طور بيلف يجر فساقية
هى دى عيشة ؟
فى ستين داهية
طب ما تقوللى البت يا أونكل
يعنى خلاص قربت أتوكل
أحسن برده
عمرى بطوله يشبه عرضه
ودا قضا ربى
مش راح أعارضه
شوفى يا بنتى
لما تحبى تنادى عليا
نادى براحتك
قولى يا أونكل ، قولى يا عمو
قولى يا والدى
شوفى مصلحتك
وانا لانا حازعل، ولارايح أرفض
ولا حاتنرفز ’ ولا حاحتج
وان كنتى عايزانى أحبك
نادى عليا وقولى يا حاج