هش يا هش ياهش يا هش
إسمع يابني أبوك الدش
حكمة ح اقولها وانت اعقلها
بس إوعاك يا حبيبي تكش
عايز تفسد أمة بحالها
إزرع فيهم غيط ( معلش )
تطرح كوسة الكل ياكلها
تملا الدنيا قرع فريش
كل ما تجمع تطرح تانى
تفضل تطلع مهما تحش
أسلوب مصري مية المية
منتج حصري بإيد مصرية
كلمة وليها مليون معنى
بس مافيش ترجمة فورية
عكس السير داخل مش عاجبه
كدا ممنوع فيقول (معلش )
يلقى الصول لعبله حواجبه
لاجل النطع يخاف ويكش
فيطبقله حاجة تناسبه
تلقى الصول سابه ولا حاسبه
ليه يا جناب اللوا فوتته
يضحك ليك ويقول (معلش)
واحد تانى بانيله عمارة
كان قبلها فى الحى ورش
خالف الرخصة وعللا وعلق
بعد ما باعها الأمور فلق
فجأة لقوا العواميد بتفلق
جا اللى يعاين واللى يحقق
لقوا خلطتها كلها غش
هاتوا فولان لازم يتحساب
تلقى الناس بتقول لك حاسب
أصل فولان مسنود كدا وش
يعنى تلم الدور وتطنش
وتصدر أجدع (معلش)
فى التعليم تسمع (معلش )
أما الصحة 100 (معلش)
والقوانين كلها (معلش)
والأخلاق بردك (معلش)
اللى بيسرق ياخى (معلش)
واللى بيفسد طب (معلش)
واللى بيتأخر (معلش)
واللى بيتمسخر (معلش)
واللى يبيع بلدك (معلش)
بيموت ولدك (معلش)
بيسرطن فى أبوك (معلش)
بيسمم فى أخوك (معلش)
بيبيع اللى جابوك (معلش)
إنت أساسا موت ما تعيشش
ما تحققش وما تفتشش
واحمد ربك إنك لاقى
كوز فيه مية ولقمة مش
كونك عايش أو مش عايش
إنت أساسا ما بتفرقش
عايز تفسد أمة بحالها
إزرع فيهم غيط ( معلش )
...........
هشام الدشناوي