وبعد دراسة الواقع
وبعد معاينة الأشواق
أنا قررت تحويلك
لقلبي وليري ماشاء
دي بصماتك عليه واضحة
وتأثيرك عليه واقع
قضية وثابتة أركانها
مع الإصرار علي الدافع
جناب المستشار قلبي
ح تحكم وللا تترافع
ليه مديني الشعور إنك
بدأت تحن وتدافع
ح تبقي محامي باينك
ضعفت يا قلبي مش نافع
ف سيبلي ا لإدعاء وانت
حتبحث ورقي وتراجع
أنا المجني عليه منك
وانا المخطوف في أحضانك
وانا المقتول بعيد عنك
وانا المصلوب علي حطانك
وانا المسحور بتعويذتك
وانا المجبور علي حنانك
وانا اللي إرادته مسلوبه
بنظرة واحدة من عينك
وانا اللي عواطفه منهوبة
وانا اللي عنيا عاشقينك
ياقلبي افتح الجلسة
وياللا نحاكم المجرمة
وخلليني أنا الحاجب
وانا حانده واقول محكمة
يمين بالله تقولي الحق
حتعترفيلنا ولا لأ
مش انتي بمنتهي الرقة
جعلتي القلب ليكي يدق
سحرتي العقل بجمالك
ملكتي روحي بدلالك
وكتفتيني وبخفة
بأصفادك وأغلالك
دي سفاحة ومحترفة
وشهدوا شهود علي ذلك
ودا الثابت من التحقيق
ودا الثابت في أقوالك
حكمنا والنفاذ وقتي
مافيش فيه نقض وللا طعون
نحيل أوراقها للمفتي
وهو حيبعت المأذون
..............
هشام الدشناوي