يافجر شقشق والنبى
الليل بقى ف طوله غبى
عايز احقق ماربى
وانعم بنورك فى الصباح
يافجر صوت الزقزقه
له القلوب متشوقه
امتى يبان نورك بقى
من بعد حى على الفلاح
يافجر فى طلوعك شقى
ارواح تروح المشنقه
وابدان تنول المحرقه
لكن لابد من الكفاح
يافجر متاخر قوى
لابد ليلك ينطوى
من شوقى قلبى بينكوى
الليل باينه جاى سفاح
انا قلبى عاشق طلتك
باتمنى منك بسمتك
والليل متوه سكتك
يافجر دنيانا البراح
نسمع ادانك من بعيد
يسكن معانا فى الوريد
يافجر للعمر الجديد
قربلى يازين الملاح
الشمس نورها بيناديك
عايزه تغازل طهر فيك
تسمع ادان من شيخ وديك
وتداوى بشعاعها الجراح
يافجر الامانى فيك
نتهنى ونفرح بيك
المولى الكريم يحييك
القادر مجيب فتاح
.........
كلمات_ احمد عبد الوهاب_
ابن بيرم