ممشى عذابي ...بقلم الشاعرة المتميزة / نادية فتوح

 








السلك الشايك ..
اللي فردته بطول دراعاتك
واللى رميته مابينى وبينك
وانت الشابك طرفه بصورتك
جوة حنايا القلب الوردى
واللي كمان عَمّال بتشده ..
بنون النسوة وحبل عنادك
وانا عمالة بكُل ما عندي
بحاول اعدّى
زاد فى عذابى ....
إنك تعرف تيجى لحدى
وانت الواقف على تقديرك
بحروف عطف بكل تحدى
وانت القادر حتى تخلى
نار الغيرة ف قلبى تهدّى

لكن فارد ممشى عذابي
بطول الشوف
وانت اللي بتتمشّى حروف
تملا السطر بحاله كلام
تبدا نقطه ف أول جُمله
تنهي علامتين استفهام
وبكرابيج جغرافيا القسوّه
تمسح تواريخ الأيام
وانت الخوف اللى مخلينى
أنسى سنيني
وانسى كياني بحاله ف لحظة
ما انت تجينى
إنت الموت الساكن فيّا
وانت اللي ف إيدك تحييني
وانت القايد ناااارى وحيرتى
اللي تعدّى حدود الوصف
حتى الخطوّه اللي بخطيها
ترجع بيّا سنين للخلف
وانت الشابك طرفه التانى
بين تلافيف العقل الواعي
بقوة ولطف !
زاد فى عذابى ...
إنّك حابب فيّا الضعف
وانك عارف إمتي تعدي
لروحى بعنف
يااااااه ياحبيبي ....!!
انت الروح للروح وصلانى
ما بينى وبينك ...
و اما تغيب قلبي بيسألنى ..
فيييينك فينك ؟؟
هات من تانى لقلبى وريدك
هااااااات تنهيدك
خلّي اللحظة تكلبش عمرى
تملى ف إيدك
خلّي القلب بشوقه يزيدك
من طعم الحُب الترياق
ليه ياحبيبي ..؟؟
خلّيت قُربك منى فراق
حتي فى بعدك ماااادد إيدك
حالف تمحى خلايا العشق
اللي بتنزف باﻷشواااااق
زاد فى عذابى ....؛؛
إنّك دايما واحدك قادر
تغزل خيط لسنين أحلامى
وانك حتى ف لحظة بُعدك
مستكتر تضحك ف منامي
وانّك ماسح كل كلامي
من ورق الحلم المتبعتر
وانك تقدر
تحذف من قلبي المُستقبل
وانّك حتى بدون ما تفكّر
بتسلمني لبحر اليأس
وانّك رافض حتى تحس
وانّي زرعت نهار ف طريقك
وانت دبحت شعاع الشمس
ﻻ ياحبيبي ....لأ يا غراااااااامي
أنا قررت ابدأ من تانى
أمشي السكه ف ممشي عذابي
خطوّه بخطوّه
إنما وحياتك .. بالعكس
......................................... 
نادية فتوح