علي زيتنا
علي دقيقنا
نشف ريقنا
جرينا ... بس مالحقنا
جحا .. حماره
ولما اتقل مقداره
فدق البغل مسماره
في حلق الباب
وكانت دقه ع الطبطاب
ورجت بيت
لاقيت الدقه بكتافي
ولا اتخضيت
لا عرض وطول
دا ياما دق فوق راسي
جيوش بطبول
ومصراني ياما اتكعبل
وحاش البول
وتفضل مصر باقيه لنا
وكله يزول
خلاصة القول
أنا قاعد علي قلبك
يافرع الفول
لحد القرن مايحبل
منا أهبل
لكن لا قلبي ولساني
بقا دلدول
ففرقي واضحن جدا
مابيني ودول
ولو بزعل
ساعات منك
فبزعل
بس مش سايب
دراع النول
ولا عايز أبيع لحمك
لبطن الغول
ولا عايز عقاد نافع
ولا عايز عقاد مبلول
أنا الترس اللي متوصل
علي البندول
وانا المدفع وانا الإسطول
خلاصة القول
انا الحلم اللي في ايديكي
ومش حيزول
........
م .عطية شواش