مع انك مابتشوفنيش
ولاصوتى بيوصلك
مع انى هاموت واعيش
على نبضايه توصلك
لكنك صورة ادامى
بترسم كل ايامى
ملامحى حتى احلامى
بترسم دُقه عالكورنيش
وملح و عيش
ماتوحشنيش
...............
ياقلب براح يساع الكون
ياضحكة طفل بيقهقه
على رسمة بمليون لون
على حدوته بالكارتون
ياطعم الملح والقراقيش
ماتوحشنيش
...............
بحبك وانت جنيه
على شطى معديه
على الرملة مدارية
شطوط اوزوريس
ولحظة خوف على حورس
يتوه منك
ياست ايزيس
على خوفك يروح مايجيش
ماتوحشنيش
.............
انا نبتك ونا فاسك
اميرك كل حراسك
انا المقتول على بابك
ونا المسحول فى محرابك
انا نيلك انا جيلك
وقرأنك وانجيلك
فى وقت الشدة شدادك
وبين قلبك انا الدرويش
ماتوحشنيش
.................
عادل التونى