قصدنا الباب وصفينا النوايا
مادام الخير بيبدأ من نواية ..!!
فلا نندم على احلام تفوتنا
ولا نتغر .. لو دارت رحايا ..!!
ونزرع ف الأمل يمكن يصيبنا
ولا نرضاش بغير الحق غاية ..!!
ولا نحلم بغير الستر لينا
ف وقت الحلم اصبح فيه جناية ..!!
وقاضى العدل بيبص لنصيبنا
وحارس ع الزمم واخد شقايا ..!!
وأنا اللى بنيت ولا حسيت دفاهم
بيوت العز من فاسي وبنايا ..!!
وانا اللى كسيت وبإيدى السراجة
وانا اللى دفعت من دمى الجبايا ..!!
وانا اللى زرعت ما شبعت جوعى
وانا اللى احترت بين قوتى ودوايا ..!!
قصدت الباب وقولت الله معينى
ف عينى الدمع و ف ضهرى النكاية ..!!
ف وشى الريح ولا قادر أطاطى
ومركب سكتى للصبر آية ..!!
يهد الموج من جهد العزايم
آلاقى ف ضحكتك مبلغ منايا ..!!
اعافر والطريق بيطول عليا
تاخدنى ايديكى من قهر البرايا ..!!
لجنة دنيتك ... يرتاح فؤادى
لطيب الأصل و تكون البداية ..!!
سقانى الشهد من ريقك كاساته
وطيبة القلب .. بتهون بلايا ..!!
قصدنا الباب أنا وانتى حبيبتى
فلا ضليت ولا كانت غواية ..!!
..............
سعيد شكري