كل ما بفتح شباك قلبي
لضيّ عنيك
كل مااصالح نفسي وعمري
وروحي عليك
كل ما ببعت أشواق حبي
تطوف حواليك
وانت بعيد
واسمع كل الهمس ف ودني
وليه تعاندني....
وتقفل كل مواني ضلوعك
قبل ما ترسى سفينة حبي
وتسكتني
كل حروف الخوف في ملامحك
لو هاتفكر
قلبي يسامحك !؟
بعد فراقك ليَّا سنين
إني هــ ألين
أو هجري عليك
ملفوف قلبي بكل حنيني
ومش بتملّ
دموعي ف عيني
طب والحلّ!؟
بعد الحب ف قلبي ما كلّ
بعد هوان قلبي المحتلّ..
بزيف أعذارك
كان ليه حبك
ولَّا اختارك
مهما تصلي
وكانت دقات قلبي
القِبلة ... لكل مزارك
مش راح يغفر
يوم أوزارك
مش راح يفضل
دوران نبضي
ف نفس مدارك
هاارجع ألمّ ستاير جرحي
هااغزل فرحي بخيط أحزاني
من طعناتك
همسح كل حروف أشعاري
من أبياتك
تفضا قصايدك
من إحساسي
وإسأل نفسك ..
يمكن ناسي!!!
مين كان علِّم
قلبك يعشق ؟؟؟!!!
........
منى الغريب