لمَّا يكون الحب طريقنا
نلقى الدنيا مشاعل نور
والعصفور ع الشجرة ح يقرا
سورة الفجر وسورة النــور
والإنسان ح ينــاجي ف ربه
بالقرآن ودعــاء مأثور
.....
لمَّا يكون الحب طريقنا
نبقى مشينا في حب الله
نغزل توب الفرح ونسعى
والأرزاق من عند اللـه
والمخلوق لو سبّح ربـه
يلقى جميع الخير وياه
.....
لمَّا يكون الحب طريقنا
كل أمـور الشر تزول
المسئول ح يراعي ضميره
والمظلوم ح يلاقي حلول
بين الحب نعيش أحلامنا
يبقى الصدق ما بينا رسول
.....
لمَّا يكون الحب طريقنا
كل هموم الدنيا تهون
يومها نلاقي حبيب بيواسي
ويومها نلاقي الأخ حـنون
يستناك والقلب بيضحك
والأشواق بتغطي الكون
.....
لمَّا يكون الحب طريقنا
كل الدنيا ح تسمع نـــاي
يعزف لحن الـود .. ويجمع
كل اصحابنا في سهرة شاي
ننسى الحزن وننسى همومنا
نلقى الحب في صوت الناي
.....
لمَّا يكون الحب طريقنا
مش ح نسافر للمجهول
صوت الحق ح يبقى ضميرنا
نبني ونبني وتعلى الدور
فوق الماضي ح نبني الحاضر
سطرمحبة وسطر زهور
.....
لمَّا يكون الحب طريقنا
الأغصان ح تـلاغي طيورها
والإنسان ح يعيش مسرور
شمس الصبح ح تطلع دافية
والأحلام ح تشوف النور
نلقى حياتنا جميلة وهادية
فوق الصحرا ح نبني قصور
===
محمد البهنساوي