درويش وبيغني
ارسم حروف زمنك
غنوة وحدوتة
من بدء كان ياما كان
ولحد توتة توتة
ارسم وقول عنها
حدوتة ملتوتة
اولها كان الولد
يحلم ببنوته
واخرها مات الولد
والحلم ميت موتة
.......
اوعى تكون فاكر
ان الزمن زمنك
تكتب عليه اسمك
وتلاقي فيه امنك
الاهل والصحبة
عاملين كما بدنك
عودك ريحان اخضر
والطير يقول لحنك
تحلم بان في يوم
راح يندفع تمنك
...............
متباع رخيص يا ولد
والسوق مهوش سوقك
مليون ايدين تضربك
مليون قدم فوقك
منداس عشان عمرك
زمنك ما كان زوقك
مدبوح في قلبك هواه
مكتوم كمان شوقك
جاهل بقرش معاه
هيشب ويفوقك
..............
كان عندي ألف كتاب
فيهم قصص ياما
ارنب وكان مغرور
والدنيا دوامة
بتلف بيه وتدور
ويطير كما يمامة
لكن يقع مكسور
لا عتاب ولا ملامة
أيه ياترى نساه
الموت عليه شامة
............
كان عندي ألف كتاب
فيهم حكاوي كتير
مملوك وظن في يوم
انه ملك وامير
يأمر وامره مطاع
والكل عنده اجير
ولا يوم حمد ربه
على فيض دهب وحرير
ناسي ان اصله تراب
والدود وراه قناطير
.................
وكتاب كمان منهم
فيه الورق باهت
يحكي حكاوي كتير
عن ناس كتير تاهت
جريوا ورا الدنيا
شابه ولو شابت
ومزينة توبها ولاحد
يوم سبها لكنها سابت
اوعى في يوم ياولد
تطاوعها لو عابت
.............
قصة كتاب منهم
راجل فقد ضله
تايه في ارض الله
ولا حد بيدله
نسله في يوم هيضيع
زي ما ضاع اصله
مكتوب عليه يفضل
عايش بلا خله
لو يوم حلم بالنور
الضلمه هتشله
..........
قصة كتاب منهم
انسان في صورة ملاك
لو يوم يشوفك سعيد
يحلم يصيبك بلاك
شهد اللسان منه
وفي قلبه ضلمه وحلاك
بيصب سمه في كاس
ويقول في كاسك حلاك
لو يوم تأمن له
يرميك في بحر الهلاك
...................
أخر كتاب حواديت
راجل من الدراويش
قلبه يساع ملايين
لكن في جيبه مفيش
شايف كتير وقليل
لكنه مابيحكيش
اصله ان حكى مرة
حسبوه من المهابيش
عكازه بيقوله
الدنيا لو ضحكت
الموت ما بيخليش
..............
سمير عبد المطلب