خطوة واحدة في
شوارعنا القديمة
فكرتني باللي فات
فكرتني بكل كلمة
حتی لو كانت سكات
فكرتني بيوم لقانا
بالدقايق والساعات
حتی أيام الشوارع
والحدايق
والبحيرة
يوم مارحنا ويوم
ماجينا
لما كان أول لقا
يومها ودعنا الكلام
هيا لحظة والقلوب
اتعرفت
قالت سلام
عارفة ليه
أنا قلت لك قبل اللقا
قابليني ليه
وماردتيش
من أول السطر التقيتك
كاتبة لا
لأ .. لأ .. لإيه؟
للحب ولا للقا؟
معرفش ليه حسيت بإنك
عايشة نفس الإحساسات
تتمني ننسی الذكريات
ونعيش حياتنا ف يوم جديد
نبعد بعيد
ننسی اللي فات
وكل شيء عشناه سدی
بدون حنين وبدون لقا
عارفة ان حبك خلی
كل الدنيا
أجمل من آمال متزوقة
إحساسنا محتاج للقا
كلام كتير يتقال هنا
حبة آمال مجدولة في
قلب الخيال
أمانی مش عايشة الحياة
حاجات كتير بإيدين جروحي
مرسومين
متصورين
محتاجة قلب
محتاجة نية مخلصة
أحس فيها من سكات
حبة شقا
وحبة حنين
حسيت بحضن المحرومين
وعرفت انا محتاج لإيه
مش كل فرحة ف قلب حد
نقول ده حب
مش كل إحساس بالأمان
في حضن حد
يبقی اسمه حب
مش كل لمسة من إيدين
متكتفه
نفرح بها ونقول ده حب
الحب مش إحساس متاح
بنحس فيه طيبة وسماح
الحب أكبر من كده
إحساس جديد
شعور قلق
خوف من فراق
سهد وشجن
لحظة لقا متعطشة
بلمسة إيدين
نظرة غرام فيها اشتياق
إحساس بأنك لو لقيت
إنسان جديد يديك أمل
تبقی الحياة
فاكرة اما مرة قلت لك
خليني أطلب نمرتك
إديني فرصة أكلمك
قلتي لي: لا
دايما تقولي الكلمة دي
ولا ألف لا
تمنع حنانك واشتياقك
للغرام
وكان بيحصل بعدها
إنك توافقي ع اللقا
وبعدها
بنعيش حياة
بألف مليون معجزة
بنعيش أمل
فاكرة اللقا
في لحظة واحدة كنا فين
فوق السحاب
طايرين انا وانتي ف سما
شايفين نجوم
دايبين ف بعض وشبطانين
للحب كنا عطشانين
مقدرش اقول أول لقا
ده مستحيل
يمكن يكون
مليون لقا
قبل السما ماتكون سما
قبل النجوم ماتكون نجوم
قبل القمر
قبل مايبقی هناك بحور
قبل ما نعرف
إنه فعلا ده قدرنا ف حبنا
عايزاني اقول تاني واقول
مش هقدر اوصفلك أنا
حسيت بإيه
حسيت بشيء معرفش
وصفه يبقی إيه
كان شيء جديد
كان زی إكسير الحياه
لحن الخلود
عهد ووعود
ضحك وبكاء
نبض العروق
بسمة أمل
ازای اقولك كنتي فين
ولما جيتي ف الخريف
وصلتي ليه متأخرة
عشرين سنة
أنا عمري راح
صعب اني اشوف
قلب الربيع
وانا عدی مني
كام ربيع
ده شيء مريع
ده مستحيل
مبقاش أنا
أنا لو قبلت اني أكون
حبة رمال
متبعترين علی الشطوط
مقدرش اسيب كل
الخطوط
واكتب علی شط الأمل
أكتب حروف متلخبطة
محتاج أتوب
واكون مجرد معجزة
تنقل حياتك م الرمال
وتروحي في أبعد سما
وانسج خيوط متقطعة
محتاجة مني أكون ملاك
ألضم حياتي بالألم
وارسم علی كف الحياة
حب وأمل
___________
عبد الله مطر