جمعت من عينى الصور ،
والصوت ، وحركة خطوتى
وخفيت مفاتيح الزمن من سكتى
محتاجة أشرب قهوتى -
من غير --- آلم .
كان فيه هنا .. سكر وشاى ،
وعلبة .. فاضية ، وحُق بُن
واديتها فين؟
الحال يجن.
مش ح افتكر
مش عايزة أبداً أفتكر
كل الحكاية ف شنطتى ..
فكة قروش - لأ ..لسه فيه
خمسين جنيه
خفياها تحت مخدتى
أنا عايزة إيه
غير .......قهــــــوتى !
يارب حوش عني النكد
أنا لسه ح انزل واشتري
لو .. بس كان عندي الولد !
إنزل يا واد و اطلع وهات
وحاجات كدة ؟
سرحانة ليه
ولوحدي ليه متنكدة ؟
أنا عايزة إيه ؟ آه قهوتي
سكر بكام والشاي وغيره
طارت الخمسين جنيه ..
باقي م الشهر قد إيه ؟
مش عايزة احسب تاني ليه
خليه يفوت ،
ولاَّ قِلة آكلي ح تخليني آموت
خليني اموت ، وانا ح آكل إيه؟
لمَّا الخضار سرطانه أصبح منه فيه
واللحمة حماري وانا لحم الحمير
مش غيتي .
وفراخ وطير مرضان خطير
وانا صيف ،شتا على فرشتي
إن كنت بطلت السمك
وانا روحي فيه من صُغر سني وطلعتي
نقصاني أمراض الطيور
أحسن تغور
كل المصيبة في اللي جاي
سكر بكام والشاي بكام - خنقة وزحام
ومافيش هوا
فين الدوا ؟
نضارتي فين أوراقي فين
طب علبة البُن اللي فيها
بانسى حزني ، ووحـــــــــــــــدتي
واديتها فين ؟
تليفوني فين ؟
مين طالبة مين
هوَّ انتي أصلاً صاحبتي
أوراقي فين ، نضارتي فيييييييييييين ؟
...............
وداد الهواري