زى ما يكون جوه روحى شئ غريب
لخبطة
فيه حاجات مبقيتشى منى
وفيه حاجات مش قد سنى
وكلمة بالخط العريض
لكن عليها شخبطة
فيه مشاعر عاوزه حد يلمها
وحاجات كتيرة الدنيا مش بتهمها
وحاجات كمان محتاجة فرد وتنكوى
انا اصلى حاسس ان روحى مكرمشة
غير القلق والصربعة
كتر الألم حاوط جهاتى الأربعة
والشمس طلعت فى العشا
ومفيش دليل اقدر اقول انه أنا
اللى بداخل جتتى
محتل من أحاسيس كتير
والحرب دايرة ف دولتى
بسلاح محرم صنعته
وانتى الجزيرة اللى عليها لاختلاف
وانا القصيدة المشكلة
وحبيبتى عاوزه قرار سريع
من هيئة الحب السوى
لازم نصمم بالقوى
ان الهوى عاوز جلاء
علشان احرر فرحتى
لازم نطعم عشقنا من كل داء
ولابد يبقى فيه وقوف
فى وش معدومى الشرف
فى وش تجار القرف
لابد ثورة ع اللى فات
يسقط نظام العاشقين الأغبيا
يسقط بتوع الخد وهات
يسقط كمان الإمعات اللى فى توب الأوليا
قلبى معادشى فيه أهات
عدى الوجع بحر الشعور
انا قلبى أصبح قلب بور
ومفيش خضار غير ضحكتك
وانتى النجاه
وانتى الوحيدة اللى باشم ف جوها
ريحة حياة
والعدل انى ياموت ياعيش
عاوز رئة
أو تخنقينى وتخلصى
واخلص بقى
الفارس اللى على الحصان
عمره ما بيحارب كلاب
انا سيقى فوق المستوى
طول عمره بيطير رقاب
وصهيل حصانى عيب عليه
يطلع فى وسط الهوهوا
انا شعرى بيحرر عبيد
يطلق سراح المسجونين
من كل دين
والعار عليه انه يحارب قوادين
عرضوا القصيدة عارية
مين اللى يعرف يسترك؟
الكل عاوز ينشرك
ملعون ابوها لقمة كانت من حرام
العيش ملقح ع السكك
والملح طول عمره ببلاش
فامبدهاش ان احنا نستنى الأمل
طب لو مجاش ؟
الحل ينفع نختلف ؟
ولاّ نسلم أمرنا لمرابى عايش ع السلف
ولاّ نبيع الحب فى مزاد انما
أو يعنى نرهن عمرنا عند السكات
ولاّ نبات على سيرة من يمكن... يجوز
أو ربما أو احتمال أو بعدما
يا ملهمة
باقى القصيدة منتظر منك مدد
مليار باحبك افهمى
خايف على الواحد قوى
يجى على يمين العدد
وتشوفى صورته وهوه مش لاقى السند
فايموت كمد
و ساعتها لو فيه ألف صفر
هايبقوا صفر
بس مش صفر العدد
.........
حمدي موسى