و عشان أنا أخر العنقود ...
واد مدلع بعيون سود ..
ديما أسافر ..
ديما أعافر ..
و أما الدنيا تضيق في عنيا ..
أجري و أروح علي بير مسعود ..
و أوشوش في العملة الفضه ..
أقلع و أرمي الدبلة الفضه ..
أفضل أدعي لرب الجود ..
إن حبيبي في مرة يعود ..
** ** ** **
فاكر إنت يا بير مسعود ؟
لما حبيبي طلب و إتمنى ؟
إني أعيش وياه في الجنه ..
إني أشوفه أفرح و أتهنى ..
فاكر لما إداني وعود ؟
إنه ليا ..و كل ما فيا ..
و إن لا يمكن يحصل أبدا ..
أبدا أبدا أبدا أبدا أبدا أبدا ..
لا هنتفارق و لا هنفارق ..
و لا يوم دمع يبوس ف خدود ..
كل الناس علي حبي شهود ..
فاكر إنت يا بير مسعود ..
** ** ** **
كنا بنرسم فوق الرمل ..
وعود و عهود ..
صور و قلوب ..
حروف وشفايف ..
كان القلب ينام مش خايف ..
هي إختارك إسم ولادنا ..
و إختارت أسماء أحفادنا ..
برضو إختارت هي بعادنا ..
فاكر حبي يا بير مسعود ؟
** ** ** **
كان الموج يحضن ضحكتنا ..
كان يكتب ويانا غنوتنا ..
كنا بنرسم سوا سكتنا ..
كان الحب ملهوش حدود ..
شوق و حنين و هيام و ورود ..
لسه حروف أسمينا هناك ..
عند الصخرة هناك وياك ..
شاهدين علي أيامنا معاك ..
فاكر قلبي يا بير مسعود ؟
** ** ** **
يا هل تري لسه بتحكيلك ؟
لسه بتيجي و بتغنيلك ؟
و بتشكيلك م الايام ..
و بترجع لسنين أحلام ؟
و لا خلاص عاشت في غرام ..
نسيت قلبي و نسيت حبي ..
و نسيت شكل العملة الفضه ..
نسيت حتي الدبلة الفضه ..
يالا خلاص العمر إتقضى ..
و بقت ذكري و مش هتعود ..
مش باقي غير بس وعود ..
و حلم صغير راح و إتغير ..
بس الشوق مبقاش موجود ..
.......................
بقلم مصطفي تيسير