انا نفسى اقولك شعر متقالشى
ومحصلشى ولا هايكون
كلام من خارج اللهجة
كلام محتار مابين الفرحة والبهجة
يكون موزون
كلام لايق على عنيكى
يكون من فضل خير حبك
كلام يتشاف
حبيبتى عواف على وجودك
صباح الفل والياسمين
مساء النور
نحياتى فى كل أوان
انا شاعر عشان انتى ميزان وبحور
انا معرفشى بهواكى قوى كده ليه
ياليلة القدر انا شوفتك بقالى شهور
انا شوفتك فى ذى الحجة وذى القعدة
وفبراير دا غير يولية وغير يونية
وكياك وهاتور
انا شوفتك فى كل مكان وكل زمان
عشان انتى هنا ف قلبى
هلال رمضان
حبيبتى انتى الليالى العشر من عمرى
وانتى الفجر
وانتى الشمس وضحاها
باحبك ساعة مخصوصة
مفيش فيه وقت وياها
ولا دنيا عشان تنداس
حبيبتى يعنى ايه الناس ؟
............
حمدي موسى