لازم نزور الأوليا
نرقى هوانا نبخره
لازم نطوف
الحب مش قد الحسد
والشعر مش قد الغزل
عاوز حروف
والمعنى واقف مستحى
والفكرة بتفكر بخوف
وانا وانتى فوق المستوى
حبى وحبك مش هوى
احنا اللى طورنا الأمل
بقى جمع مش مفرد ولا
أصبح صلا
يدعى شعورنا يستجيب
انا وانتى حاجة مذهلة
اتنين وبيننا ميت صلة
من بين أحلام ودم
قلبى وقلبك والقمر
صبحم حليب
الدنيا صبحت تنكسف
من شكل سكانها الغجر
حتى الشجر بقى للأسف
واقف غريب
لا طيور تآنس وحدته
رافض يسلم ضلته للشمس
من قبل المغيب
الكون بيعلن ثورته
عاوز عنيكى تحكمه
عاوز هوانا يستره عن كل عيب
انا وانتى لازم نرتقى
سابع سما
تنزل بسجدة كلما كان الخشوع
فا تعالى بالمعنى اللى ممكن ينكروه الأغبيا
نعلن بأننا فى الهوى يوحى إلينا
بعد كل الأنبيا
ندعو الحياة للحب شعر وأمسية
وساعتها كل الأوليا تطلب تزور
تيجى لغاية عندنا ترمى النذور
ويقولوا كانوا اتنين تلاته اربعه
خمسه وسادسهم حبهم
سته حرسهم قلبهم
عن كل زور
فانموت ف بعض ونندفن
ف اللا مكان
نبقى لا كنا ف يوم بشر
ولا كنا جان
ارواح مسكنتش البدن
ولا ليها دعوة بالزمان
وتتوه ف تفسيرنا الكتب
نصبح أثر
لكن أثر من غير مكان
.......
حمدي موسى