أقتلوني .....
ماتخافوش
بكره راح تاخدوا براءه
وانهبوا ف ارضي وعرضي
وببجاحه وبجراءه
واسرقوا ف مالي وحالي
وما تخافوش
طول مافيه قلوب وحوش
طول مافيه نفس الوشوش
إقتلوني وماتخافوش
بكره راح تاخدوا براءه
****
إقتلوني ....
دمي مش هايروح هدر
دمي مش راح يبقى أغلى
م اللي راحوا
قلبي داب من صوت جراحُهُ
هو دا حكم القدر
فادبحوني بدم بارد
ماتخافوش
ياللي علشان العروش
بتستبيحوا مص دمي م الوريد
ومش بعيد
تتقاسموا لحمي ... وتهتفوا:
هل من مزيد؟
حاسس بلحمي بيتمضغ مابين سنانكم
سدين ودانكم ...
ومش بتسمعوا غير ادانكم
وطول مافيش قاضي أدانكم
انهبوا واملو الكروش
وماتخافوش
اقتلوني
وانظروا لجسمي اللي عايم وسط دمي
وما تمسحوش ...
.. دمعه نازله بتشتكي على خد امي
ليها رب اسمه الكريم
هو اللي قادر ع القصاص
من اللئيم ابن اللئيم
فاستمتعوا بيومكو.. مين اللي هايلومكو
وبرطعوا .. واتمطعوا...
بنفس البجاحه والجراءه
مانتوا واثقين أنكم
بكره راح تاخدوا براءه
ف ماتخافووووووووووش
.....................
محمد الساعي