مش عارف اكتب فى الغرام
ولا قادر اكتب فى الهوى
قلمى اللى معجون بالهيام
إحساسه دون المستوى
قلمى الجميل المعجبانى بقت هدومه مكرمشة
شعره اتنكش
قلمى اللى كان بكاش وعايش ع الهزار
بطل بكش
الهم ماسك قبته طابق فى زمارة رقبته مثبته
وسط الميدان.....قلمى اتعكش
اصبح أسير المخبرين
ورموه فى تخشيبه ورا قلب الزمن
وسط الركش
كل الكلام واقف على حدود الوطن
واتسرطنت كل الحروف الخاصة بالشوق والغزل
قلمى انعزل
بعض الكلام بيكون فى بعض الأزمنه شئ مبتذل
وانا يا حبيبتى باعتذر عن كل كلمة ما قولتهاش
زمنك ما جاش
والحب لسه ما ابتداش
دستوره لسه مانكتبش
واللجنة لسه ناقصها عضو عن الهوى
وناقصها عضو عن الأمل
وناقصها عضو عن الغنا
وناقصها عضو الشعر وزان الجمل
وناقصها سنباطى بليغ يعرف يصيغ موجى أنا
وناقصها عازف للقانون
وناقصها عضو يكون بيفهم فى السهر
يعرف يخللى الليل حنون
وناقصها عضو عن الربيع علشان يكون طول السنه
وناقصها عضو الإنسجام والسلطنة
وناقصها عضو عن القمر
وناقصها انا
ودخلها عضو عليه ذنوب لساه ما تبش
الحب لسه مابتداش
دستوره لسه مانكتبش
ولما يبقوا يكتبوه
والله لا هقولك كلام كل اللى عشقوا ما يعرفوه
تفتكرى آدم لما شاف حوا فى أول يوم لها
ايه قال لها ؟
انا هاخترع لك مفردات
وهاخللى كل المخلوقات تتمنى لو كانت بنات
واللى يخلف واد يحاول يوأده
وهاجنن اللى بيولدوا
انا اصلى عاشق قلبه ياما استعبده
وهانبقى انا وانتى الوحم
ويدورا على عشقنا بين الفصول الأربعه
علشان يحاولوا يقلدوه
بس اصبرى لما الوطن يسكن على كوكب جديد
ونروح سوا نرمى بدور من نسلنا
ونعيد صياغات البشر ونقول لابونا وأمنا
آدم وحوا ازاى هزمنا الشيطنة
وآدى نتيجة حبنا كل الولاد
يستاهلوا جنة ربنا
الحب لسه مابتداش دستورة لسه مانكتبش
باش المداد فوق الرصيف
أحمر من النوع النضيف
الشمس بكره تبخره وتمطره وتعطره وتسطره
ونجيب حروف كانت فى كلمة اتبعتروا
وهانكتب الدستور بأعضاء الهوى
ونخللى أعداء الغرام يتحسروا
مادة اولى
الحب فرض ف أرضنا
وأى قلب مالوش حبيب
أى قلب مالوش حبيب
هانقيم عليه حد الزنا
.....................
..........حمدى موسى.......