لو بالكلمه ها نبنى بلدنا
وترددها كنيسه ومادنا
تبقى أدان الفجر ف بلدى
تبقى الغنوه ف قلب ولادنا
تبقى الشمس اللى تدفينا
تبقى النيل اللى بيروينا
هى الفرحه ف قلب قلوبنا
كلمه وخيرها تملى علينا
كلمه أبدرها ف كل مكان
يروى جدورها قلبى حنان
تطرح لينا الفرع الصالح
وألقى ف طرحه خير وأمان
كلمه ها تبقى سلاح منشال
أقدر بيها أهد جبال
تنزع منا الخوف والحيره
وتبنى ف بلدى رجال ابطال
أصل الكلمه بمليون معنى
وساعات منها تجرى دموعنا
ممكن كلمه تفرق بينا
وممكن كلمه يوم تجمعنا
قبلنا قالوا الكلمه أمانه
واللى يصونها مكانه معانا
واللى يخونها ويحرفها
نصرخ فيه ونقول دى خيانه
كلمه تملى عليا تنادى
راح أكتبها لكل ولادى
واللى يعوزها يفك رموزها
أم الدنيا هى بلادى
................
كلمات / رضا أبو الغيط