مش طايل الكلمة ولا طرف القصيدة
كل المعانى فلست
حطت إيديها ف سيالتها وطلعتها بدون حروف
حسيت بخوف
لما لقيت الشعر واقف ع الحديدة
إحساس قبيح لكن صريح
قاللى كفاية عليك كلام
بلا شعر بلا إلهام ياعم نام ولا اتخمد
ليلتك سعيدة
وادينى جيت واقف ما بينكم باعتذر رافع إيديا الجوز لفوق
طالب وساطه حد من أهل الكرم
الطيبين الملهمين المبدعين المغرمين المعروفين بالصدق
وبصدق العقيدة
سيدنا اسماعيل....سيد حسن...واللى ابن بيرم كونيته
صاحبى اللى زارع جوه قلبى محبته
والغايب الحاضر محمد عوده داهية العرب
اللى لا عمرى ف يوم قابلته ولا عترت ف سكته
ومنى الغريب واحمد حسن
أو أى واحد خدت منه سلفة فى الزنقة الشديدة
مع لاحتفاظ ب لانحناءة واللقب
ما احنا العرب أهل الأدب
واللى مالوش فى الشعر أب يشوف له أب
واللى مالوش ف العهد واحد يضمنه كل البيوت هتخونه
ماهى كل عيله ليها رب
والرحلة دايما بالصحابة مش بعيدة
طالب وساطة للمرور عبر الجبال
من أى شاعر له على الكلمة دلال
ساعدنى يابو عباس بفاس نفسك معايا والنبى
مهدود يا خال
عارف جبين قلمك عرق
علشان ما يزرع فى الورق جملة مفيدة
وانت وعهد الله جدع ودى حاجه أصلا ع الصعايدة مش جديدة
وتلاتة بالله العظيم لانا قصدى جاه ولا قصدى مال
وحياة مقام سيدنا النبى انا باشقى ع الشعر الحلال
واللى بيطلع م القلم
بخزنه فوق الدولاب لجل العيال
وهاقول فى متن وصيتى هما يا دوبك كلمتين
وزعوا كل القصايد للذكر مثل حظ الأنثيين
بس غاب الشعر عنى جمعتين
قلت اشتكيه لأهله وناسه وعزوته
وأزور مقام الأولياء الصالحين
يمكن ينوبنى دعوتين وتصيبنى بركة فكرهم
ينزل عليا القول مطر.... يروى القلم يخضر غيط الكراسات
ويرعرع المعنى ويشعر بانبساط
يبعتلى كلمة بنت ناس....من بيت
وآدينى جيت....الشعر فين ياموحدين الناس على درب الأمل
مخاصمنى ليه الشعر..طب ايه العمل
حد فيكوا يوم سمعنى بجيب ف سيرته باى سوء
يمشى كده من غير سلام...بقا ده كلام ؟
وبرغم ذلك باعتذر حقك عليا ياعم انا محقوق
إرجع لصاحبك تانى يا كنز العيال
لسه الرصيد ما يجيبشى أوضه وصالة حتى ف الخيال
وبكره لسه مانعرفوش جاى ع اليمين ولا الشمال
والفجر وشه عليه رتوش
وولاد يناير مكارين ماستسلموش
والميدان بيشدوا عوده ويصلبوه..
بيجهزوا زلزال ورا زلزال
وانت عارفنى ماليش ف طولة البال
فاحتمال انى أموت
والكل اهم شاهدين عليك
لسه الولاد سائلين عليك...بتبوس إيديك
بيقولوا لسه مانسيناش لمتنا عند الشيخ إمام
وفكرونى بالسويس وبيوتها ومحمد حمام
ومحمليننى ميتين سلام
للى عاشوا غصب عنهم لجل ما احنا نموت كرام
انا كنت عاوز اخدك معايا نروح لهم ساعة زمن
ونقول لهم إن الوطن بقا ع المحك
واما اختفيتوا م الحكاية الكل عك
ضحكوا علينا كلهم صومنا ف يوم الشك
وانعدمت الرؤيا وصبح الشوف طشاش
ضربوا الهلال بالغاز وبالرشاش
اصل الهلال غاوى السهر غاوى السمر
هيفوق ورح يطلع قمر
معلهشى فاتت كام سنه والعيد مجاش
لكنه جى...........بس المهم الأولياء الصالحين
تفضل تردد كل حين
الله حى الله حى الله حى الله حى
...........................
حمدى موسى