"يا بنت الناس" ************بقلم الشاعر / حلمي قاسم

 

يا بنت الناس.....
انا راجل على قــــــدى
بَجيب اللقمه مــن كدى
ولو ماشقتش ماتجيشِِى
ولا تمسك فلوس يدى
مانيش باشا ولا خوجه
ولا عنــــدى كتير اطيان
ولا كان لى فى يوم شركه
ولا عزبه ولا بستـــان
يا بنت الناس انا فلاح
ماليش ف الدنيا غير فاسى
وعمرى ما عشتها مرتاح
دا انا حتى واكل ناسى !
فمتغليــــش فـــ طلبــاتك
وترمينــى فــ وسط النار
مالوش لازمه عناد اهلك
وحَط العقده فــ المنشار
يا ترضى تعيشى ع الدُقه
فــ بيت واقع وسقف جريد
واوضه واحده فــ الشقه
وحوش واســـع وكله وقيد
وتملــــى الميه بالزلعه
وتصحى الفجر م النجمه
ترصى العيش وتحمى الفرن
وتيجى تغسلى الهدمه
يا اما تروحـــى تنسينى
تشوفى لك حبيب غيرى
وتنسى حتــى عناوينى
وبالمره خطـــوط سيرى
انا رايدك صحيح لكـــن
ظروفى مش مساعدانى
ولون حظى سواد داكن
هدوم الفقر لابســــانى
لكن رايدك وشــــاريكى
وقلبى فيكى دايب دوب
بشـــوف الدنيا بعينيكى
وانا الصابر على المكتوب
هترضى تعيشـــى ويايا
هكون لك اب ويا حبيب
هكون لك شمس دفايه
وعنك لحظه عمرى ما اغيب
معايا هتلاقى حضن امان
وايد تمسح على جبينك
وقلب ابيض وفــــا وحنان
هكون روحك واكون عينك
يا بنت النـــاس انا رايدك
فمتغليــــش فـــ طلباتك
انا فعـــــلاً صحيح عايزك
يكون لى النص ف حياتك
ياترضى تعيشى مع فقرى
وتمشى معاي مشوارى
يا تنسينى قوام دوغرى
وتنســـــى جنتى ونارى
**********
قلم/ حلمى قاسم