ولسة الليل
بتوب أبيض
معشم أهله
بالجنة
بيزرع ف العقول
أوهام
بدم إصحابة
يتحنى
وديع غلبان
يبان إنه حزين
مقهور
فى سجن الظلم
والتوهه
جناح مكسور
يسمم بالكلام
أفكار
ويقلب دفة
الموازين
وسبحة موت
ما بتفارقه
وداير بيها
ع الميادين
يزوق فى الكلام
والقول
ويلعب فوق
وتر حساس
ويسرح باللى
مش فاهم
ومش حاسس
مرار الكاس
مغمى عيونه
بإرادته
وفيه منهم كتير
مخدوع
لكن الموت
ما بيفرقش
ولا يهمه وجع
موجوع
طويل الليل
بقاله سنين
محاصرنا
معطل فجرنا
المسكين
ورافض كل
أحلامنا
بيهتف
ويا أصحابه
كفاية حياه
حرام البسمة
والفرحة
حلال الأه
مفيش مانع
دمانا تسيل
وتملا بحور
يموت الصبح
لاجل الليل
يموت النور
كفاية علينا
نمشى وراه
ونترحم ع اللى
مات
ونمسك سبحته
نسبــح
نموت
ف سكات
..........
محمود وحيد
النص رائع الشاعر متميز الموسيقى لذيذة وسليمه ..الفكرة رائعه ..والشاعر موفق فى التناول والصور ...استمتعت بالعمل واسعدنى هذا المستوى الراقى الجميل ..تحياتى لصاحب النص ولمن اهدتنا به ونشرته الأستاذة منى الغريب
ردحذف