نفسى أعدى ونفسى أفوت
نفسى الحزن ف قلبى يموت
نفسى أحقق كل أحلامى
وأبقى الفرع لشجر التوت
.........
نفسى الشمس تنور دارى
ولحن الهوى تعزفه أوتارى
نفسى يزور الفرح قلوبنا
ونفسى أعمر قلبى الخالى
..........
نفسى ف بنت وتسكن قلبى
ابقى حبيبها وتبقى حبيبتى
لما تضيق الدنيا عليا
تبقى الدنيا وتفضل جنبى
..........
أنا محتاج للحلوه بلادى
تبقى الخُضره ف قلب الوادى
تفتح قلبها دايما ليا
تبقى الأم ولينا تدادى
...............
أنا محتاج قسطين حُريه
لما أتكلم يسمعوا ليا
زى ما قلبى انا فتحه لغيرى
نفسى أنا غيرى يشد إيديا
..............
نفسى بكلمه نبنى بلدنا
نفسى نعيد للكون أمجادنا
عمر الفرقه ما تدخل بينا
لو ف قلوبنا كنيسه ومادنا
..............
نفسى نكون ف الكون أحباب
ولا يفصلش ما بينا ضباب
عمر الحب ما يهرب منا
لو ف القلب فتحنا الباب
..................
أنا نفسى نكتب أسمينا
ف قلوبنا وتبقلنا سفينه
ونعدى ع البر ونرسى
وبلدنا تبقى لنا المينا
.................
انا محتاج معجزه إلهيه
لأجل الدنيا ما بتقسى عليا
بس أحلامى بسيطه وسهله
كلها كده أحلام ورديه
........................
رضا أبو الغيط
..................