قــــــــــــانـــــــــون كبـــــّـــــــــــــــــــر ...بقلم الشاعرة / أميرة محسن

وليه ورا كل باب مقفول
بلاقى الحزن ترباسه ؟!

وليه أيامى مهما تطول
بعيش فيها سراب على طول؟!
ده انا عمرى كما الدستور
بنود العشق مقطوفة
ومتفبرك بنود أوهام
كمثل الحق ف العيشة
وحرية فى أيدها كلبش م الحكام
ف يغتالوا فى أحلامى
تشيب اللحظة قدامى
(بحبك آآآه )
لكنى كرهت أعيش فيكى
يا حطّه الكل فى عنيكى
ورميانى أنا ليهم
ك كورة شراب
ومتشاطة برجليهم
ولا همــــــــــــك !
يا مسحوبه جينات النخوة من دمك
بحقنة من عدوينك
فكل أمّا أجى أكون ترياق
تـــــــصدينـــى
يا نصحانى بإنى أعيش على البقشيش
ويوم ما أطلب على لسانك تملّى مفيش
يا حكمانى بقانون (كبــّــــــــــــــــر )
وأنا أبداً لا يمكن أعيش على قانونك
أنا أبنك.....فلازم أزيح شريط ملفوف على عيونك
أنا مش عارف أوصلك
يا حطّه ما بينا 100 ترباس
يا تهمانى بقضايا الزيف
قلم نازل..قلم طالع ..على قفايا..
يقول لى أنطق
وأنا مانطقش غير أسمك
يزيد الضرب والتلطيش
أنا دمى بيتصفى
أنا بردان.
فضمينى فى حضنك يمكن أتدفى
ولفى بإيدك الدفه
وعووووووووووووووودى
....................
أميرة محسن