وبنسافر
ونتغرب
مراكب شوق
تودَّعنا
ونبعد عن
حبايبنا
وايه خدنا
من الغربه ؟!
ونلقى العمر يتسرّب
ومهما نروح
وبنعافر
وغول الزحمه
يغلبنا
ويتعبنا
وينهشنا
بناب القسوه والحافر
وبنسافر
مانلقى غير نوايبنا
ونار الفرقه توجعنا
أتارى الدنيا واخدانا
وسكة توهه لفـّانا
ف طواحينها
وضحكة غربة تخدعنا
وبنسافر
وبنعافر
طويله الرحله
وسنينها
ودمعة بُعد
وأنينها
قلوب عطشانه
ملهوفه
بتتمنى
مراكب شوق
ترجعنا
وبنسافر
ونتغرب
مراكب شوق
تودَّعنا
..........
راضي
الطهطاوي