كراكيب ...بقلم الشاعر / محمد الساعي

 

قرص الطعميه اللي بسمسم
شدَّني للريحه المعتاده
والبحر بيلفظ اسماكه
والسمكه بتخرج م الميه
وبديل مقصوص
الواد محروس...
بيناول عمه اللي بينده
لترين بنزين
علشان التوكتوك وقَّف منه
ف نص السكه
عشرين فكه؟؟؟ ... معاييش
خدلك بالباقي بونبون ولبان
عمك شعبان قاعد بيشد يادوب نفسين
قام قاله حسين:
الواد ابن ام البت شروق بيسب الدين
قام سمعه الشيخ عباس
واداه قلمين
وش القهوه المسحوب منها
خلاها ماليها ريحة الطعم
والسما بتمطر وانا قاعد
لابس صيفي
هو بكيفي؟
مانا قمت الصبح لقيت الجو كأنه ربيع
بصراحه فظيع..
لما تلاقي عمك ايوب قاعد على باب الحاره
بيشحت
مش بس فلوس ..
انما كلمه تحسسه انه
مابقاش ميت
وعيون بتفتح على ضحكه
انما مايصه..
عالم هايصه مالهاش لازمه
اما الازمه..
انك بتشاور للتاكسي ..
لكن مايوقفش
تسأل اتوبيس 25 هايفوت امتى؟
تسمع ... ما اعرفش
عنّك ما عرفت
ويادوبك شفت
الواد تيفا بيجري ويفتح
مليون موضوع
ويادوبك لسه هايتكلم
قلتله اسكت
النور مقطوع

...........

محمد الساعي