بعد العمر دا كله
أنا هنت عليك؟!!
دا انت بجد صحيح
غدار
كنت بقولك قبل
مانبدأ
خلى الإخلاص يبقى
المبدأ
اياك تيجى ف لحظه
تبيع
اوعى الصدق مابينا
يضيع
علشان يفضل بيتنا
عمار
ياما صبرت معاك
وعانيت
وأنا بأتحمِّل
ياما بنيت وياك
ف البيت
قلت عشان أولادى
هاكمِّل
كنت تخاصم
قلبي و أصالحك
تقسى عليا وكنت
باسامحك
عمرك حتى ماجيتني
ف يوم
كلمة جميلة عشان تتجمِّل
حتى تقولها ولو
بهزار
عمرى ف وقت
الحزن ما سيبتك
كنت بحافظ ليك
على هيبتك
بس ماكنتش عايز
تفهم
إنى شريكة العمر
حبيبتك
كتر قساوتك
شوفت نجومي فى
عز نهار
مخك فيه أفكار
هدامه
فاكر ان الست بتاعتك
دى خدامه
كنت اتمنى بس رضاك
ياما عشانك
كنت بخلـِّى اللقمه
بتاعتى
ياما عشانك
بعت أنا حلقى وعقدى
وساعتى
وانت كمان تستهزأ
بيا
تجرَّح فيَّا
تقول لى لسعتى
قال ماعرفتش
يوم تختار
عمرى ضايقتك مره
... جرحتك
كنت تسيبنى لوحدى
وترجع أخر الليل
على راحتك
عقلك فيه تفكير
متخلف
حاسس إنى مجرد
فرخه
بس يادوب تفقس
وتخلف
كنت بأقيدلك ايدى
شموع
لكن أصلك نط وبان
اللى بيخلص ليك
يتهان
تملا القلب
أسى ودموع
كل دليلى معاك
احتار
فكرك دايما بس
ف نفسك
كنت أنانى
مشغول دايما عن
أولادك
سايب بس الأم تعانى
عمرى ماشفتك مره..
فاكر
تيجى ف يوم مع
ابن تذاكر
شخط معايا وكله
زعيق
لمّا تقابلك ست
غريبه
الحنيَّه تنط ف
وشك
تبقى رقيق
خليت كل حياتى
مرار
ناسى الواد وناسى
البت
قاعد بس يادوب
ع النت
ترمى سيجارتك جوه
الأوضه
تلبس جارتي وتقول
موضه
وتجرح ليا شعورى
كـ ست
عشت معاك على حلوه
ومره
جاى دلوقتى
تجيبلى الضره
وتهدد إنك ترمينى
وتقول بس... أنا
خدت قرار
بعد العمر دا كله
هنت عليك؟!!
دا انت بجد صحيح
غدار
.............
راضي علي الطهطاوي